30 de novembro de 2024. O PPdeG reivindicou hoxe as políticas sociais que durante os últimos años se veñen implementando en Galicia en materia de coidado dos maiores e conciliación por consideralas unha referencia para toda España e un exemplo de como os gobernos populares se ocupan e preocupan dos problemas reais das persoas.
No marco da XXVII Intermunicipal do Partido Popular en Valladolid, o alcalde de Ferrol, José Manuel Rey Varela, aproveitou esta mañá a súa participación na mesa redonda Os concellos, rede de seguridade, cohesión e igualdade territorial para subliñar a diferenza entre “os gobernos que resolven os problemas da xente e aqueles que só atenden os seus propios problemas”.
Centrándose nas persoas maiores, quixo destacar que “este país construíuse grazas ao seu esforzo e grazas ás oportunidades que lle deixaron ás sucesivas xeracións” e puxo o foco no reto que supoñen tanto o aumento da esperanza de vida como a soidade non desexada.
“Vivimos cada vez máis anos e iso implica que debemos traballar por garantir que eses anos poidamos vivilos cada vez mellor”, explicou ao tempo que aseguraba que o incremento da esperanza de vida “non é un problema, senón unha oportunidade e unha historia de éxito”.
Sobre a soidade non desexada, explicou que o 4% da poboación española vive soa e que esta porcentaxe aumenta no caso das persoas maiores de 80 anos ata superar o 40%. Algo que, na súa opinión, obriga ás administracións a “poñer en marcha políticas que integren a estas persoas a través dunha rede de servizos”.
Recordando a súa experiencia como responsable de Política Social no Goberno galego, o agora alcalde de Ferrol asegurou que “en Galicia aprendemos que as persoas maiores son unha oportunidade e actuamos en consecuencia” e puxo como exemplo o feito de que Galicia foi a primeira comunidade autónoma en aprobar unha lei de impulso demográfico.
Neste sentido, explicou que “ademais dun magnífico xestor, Alberto Núñez Feijóo é unha persoa moi preocupada polos maiores” e rememorou un episodio de altas temperaturas vivido hai anos en Galicia e como actuou o por entón presidente da Xunta, coa celeridade e a eficacia que demandaba a situación. Algo que, na súa opinión, exemplifica a importancia de contar á fronte dos gobernos con “xente sensible, con corazón e que realmente atenda os problemas da xente”.
“Non basta con falar dos problemas. Hai que implementar políticas para que as palabras se convertan en feitos e en beneficios para as persoas”, concluíu destacando como baixo a presidencia de Alfonso Rueda as políticas de maiores están sendo incrementadas e como a Comunidade foi quen de dar exemplo a nivel estatal en materia de conciliación con medidas como a gratuidade das escolas infantís de 0 a 3 anos.
