Ferrol, 29 de setembro do 2026. A deputada do Grupo Popular no Congreso, Tristana Moraleja, conseguiu esta mañá incorporar á proposición non de lei (PNL) presentada polo BNG relativa á mellora das infraestruturas e dos servizos ferroviarios na comarca de Ferrol unha serie de compromisos adicionais destinados a reclamar ao Goberno central unha actuación real e efectiva para modernizar o tren en Ferrol e no conxunto do norte de Galicia. Cúmprese así o compromiso adquirido polo alcalde de Ferrol, José Manuel Rey Varela, de trasladar ao Congreso a declaración institucional para un tren do século XXI, consensuada co Foro Cidadán polo Ferrocarril, co obxectivo de acadar o respaldo necesario para impulsar esta reivindicación.
As emendas formuladas polo Grupo Popular permiten ampliar o contido da iniciativa e introducir actuacións concretas que afectan tanto ás infraestruturas ferroviarias como á mellora dos servizos e á conexión de Ferrol co resto de Galicia e con Madrid.
Entre os compromisos incorporados destaca a reclamación de que ao longo de 2026 se resolva a tramitación do estudo informativo da denominada variante de Betanzos e se inicie a redacción do correspondente proxecto construtivo, avanzando así nunha actuación fundamental para mellorar os tempos de viaxe e a conexión ferroviaria de Ferrol.
Do mesmo xeito, a iniciativa incorpora a petición de iniciar o estudo informativo para a modernización integral da liña Ferrol-Betanzos Infesta-A Coruña contemplando actuacións como a rectificación de curvas, a renovación de túneles, a duplicación de vía, a electrificación da liña e a creación de puntos de cruce para trens de mercadorías de ata 750 metros, en consonancia cos estándares europeos.
O Grupo Popular tamén introduciu a necesidade de garantir a intermodalidade do transporte en Ferrol, mediante a sinatura do convenio para a construción da estación intermodal entre Adif, a Xunta de Galicia e o Concello de Ferrol. O obxectivo é avanzar nunha infraestrutura que permita compatibilizar adecuadamente o transporte de viaxeiros e de mercadorías e reforzar o papel de Ferrol como nodo de comunicacións.
Outra das achegas incorporadas á PNL reclama mellorar a vertebración ferroviaria de todo o norte de Galicia, conectando Ferrol con Ribadeo, así como recuperar de maneira inmediata as frecuencias e os horarios da conexión entre Ferrol e A Coruña, incluíndo ademais unha conexión ferroviaria directa con Madrid.
Finalmente, a emenda do Grupo Popular incorpora tamén o compromiso de impulsar as actuacións necesarias para garantir a chegada efectiva da alta velocidade ferroviaria á cidade de Ferrol, asegurando a súa plena integración no Eixo Atlántico de Alta Velocidade.
A PNL saiu adiante cos votos a favor de todos os grupos parlamentarios, salvo a abstención de Vox e Junts.
“O que necesita Ferrol é un compromiso real coa modernización do tren, non novas promesas. As actuacións que incorporamos permiten poñer sobre a mesa as principais necesidades da comarca e reclamar ao Goberno que pase das palabras aos feitos”, concluíu Tristana Moraleja.
