Ferrol, 16 de setembro de 2016.- O candidato ferrolán do Partido Popular de Galicia (PPdeG), Jose Manuel Rey Varela, sinalou hoxe que o proxecto que lidera Alberto Núñez Feijóo é o único que pode demostrar con feitos o seu compromiso co mantemento e mellora dos servizos públicos esenciais como a sanidade, a educación e as políticas sociais; aos que a Xunta de Galicia destina actualmente 8 de cada 10 euros dos seus presupostos. Así o dixo nun encontro con veciños e veciñas de San Xoán no que expuxo, ademais, a proposta da formación de mellorar os equipamentos dotacionais deste barrio coa construción dun novo centro de saúde.
Rey Varela explicou que en 2009 cando Feijóo asumiu a Presidencia da Xunta en Galicia gastábanse 3,4 euros de cada 10 en sanidade, fronte aos 4 de cada 10 que se invisten hoxe. “Mentres que uns dedicaban o seu tempo en dicirnos que nada vale e que todo estaba mal, Feijóo e o seu equipo foi quen de blindar a nosa sanidade, nun momento de crise en que os recursos públicos caeron entorno dos 2.000 millóns de euros”. Neste sentido, engadiu que “o goberno de Feijóo deu prioridade á sanidade nun momento de dificultades económicas; e na vindeira lexislatura o que toca e continuar mellorando a súa calidade e as súas instalacións para garantir a mellor atención posible ás persoas”.
Unhas melloras no sistema sanitario das que se beneficiará Ferrol e a súa comarca, pois ademais de atender a unha vella demanda e a unha necesidade do barrio de San Xoán coa construción dun novo centro de saúde, acometerase a reforma integral do Arquitecto Marcide. Ao respecto, o candidato ferrolán lembrou que nestes momentos está en licitación o Plan director do complexo hospitalario e universitario da cidade (CHUF); e que o vindeiro mes se coñecerán as empresas que o desenvolverán. “Cando se fala de sanidade pública non basta con palabrería, o que vale son feitos e o Plan director do CHUF é hoxe unha realidade que este mesmo ano poderá comezar a executarse”.
MÁIS CAMAS, MÁIS QUIRÓFANOS E MELLORES URXENCIAS
Máis polo miúdo, Rey Varela detallou que o Plan director do Marcide dotará a Ferrol e a súa comarca de máis camas hospitalarias, máis quirófanos, mellores servizos de urxencias e consulta; así como mellores habitacións para os pacientes hospitalizados. “Porá ao hospital ferrolán, que presta servizo aos preto de 200.000 residentes desta zona, ao mesmo nivel que o que teñen outras grandes cidades de Galicia como Lugo, Vigo ou Ourense”, indicou.
Por último, o candidato ferrolán pediu unha confianza maioritaria ao proxecto que encabeza Alberto Núñez Feijóo das persoas que “cren en Ferrol e en Galicia; e das que queren que o seu voto serva para decidir, de maneira directa e sen negociacións postelectorais, quen será o próximo presidente da Xunta”.
